۸صبح، کابل: د ملګرو ملتونو د بشري مرستو د همغږۍ دفتر (اوچا) وايي، د ژمي په رانږدې کېدو سره افغانستان ته راستانه شوې زرګونه کورنۍ مناسبې سرپناه، د تودوخې وسایلو او لومړنیو مرستو ته بېړنۍ اړتیا لري.
اوچا دوشنبه د تلې پر ۲۰مه، پر اېکس پاڼه ټینګار کړی چې اړمنو کورنیو ته د مرستو رسولو بهیر باید ونه ځنډول شي.
دغه بنسټ زیاته کړې: «ژمی انتظار نه کوي او بشري مرستې هم باید ونه ځنډول شي.»
تر دې وړاندې ملګرو ملتونو ویلي وو چې د شاوخوا ۲.۷ میلیونه افغان کډوالو د ملاتړ لپاره ۵۲۹ میلیونه ډالرو ته اړتیا ده. اټکل کېږي چې دغه کډوال به د ۲۰۲۶ کال له اپرېله تر ډسمبر پورې له ایران او پاکستانه افغانستان ته راستانه شي.
له دې سره هممهاله، د کډوالۍ نړیوال سازمان په یوه راپور کې ویلي چې افغانستان ته ۵۴ سلنه راستانه شوي کسان او کورنۍ د خپلو لومړنیو اړتیاوو د پوره کولو توان نه لري.
دا په داسې حال کې ده چې افغانستان له پراخ بشري ناورین، بېوزلۍ، د خوړو له ناامنۍ او د ګڼ شمېر کډوالو له بېرته راستنېدو سره مخ دی.
د بوديجې کمښت هم له زیانمنونکو کورنیو سره د مرستې په برخه کې د مرستندویو بنسټونو وړتیا محدوده کړې ده.
