۸صبح، دایکنډي: ځايي سرچینو د دایکنډي ولایت د شهرستان ولسوالۍ د یوه قومي مخور د وژل کېدو خبر ورکړی دی.
سرچینو يکشنبه د لړم پر ۱۰مه، ۸صبح ورځپاڼې ته وويل چې د دې ولایت یو قومي مخور حاجي غلاممحمد د جمعې پر شپه په خپله کوټه کې په ډزو وژل شوی دی.
د سرچینو په وینا، دا پېښه د شهرستان ولسوالۍ په «غوچان» کلي کې شوې ده.
دا په داسې حال کې ده چې شاوخوا یوه اوونۍ وړاندې هم د دایکنډي د خدیر ولسوالۍ اړوند د کیان په سیمه کې یو ځوان په خپل دوکان کې په مرموز ډول وژل شوی و.
په دې وروستیو ورځو کې د هېواد له بېلابېلو سیمو د هدفي وژنو، جنايي جرمونو او غلاوو راپورونو د خلکو اندېښنې زیاتې کړې دي.
