۸صبح، کابل: د طالبانو رئیسالوزرا، ملا محمد حسن اخند د ټاپي پروژې د پرانېستې په مراسمو کې د ګډون په موخه ترکمنستان ته تللی دی.
د طالبانو د ویاند مرستیال، حمدالله فطرت په اېکسپاڼه کې لیکلي چې د ملا حسن په مشرۍ د دغې ډلې پلاوی چهارشنبه د وږي پر ۲۱مه د ترکمنستان د «سلیمچشمه ماري» سیمې رسېدلی دی.
فطرت د طالبانو د دغه پلاوي د سفر موخه د ټاپي پروژې د پرانېستې په مراسمو کې ګډون او د دغې ډلې او ترکمنستان ترمنځ د نفتو او ګازو، انرژۍ او ترانسپورت په ګډون د نورو پراختیايي پروژو پېل ښودلی دی.
د خبرپاڼې پر بنسټ، د دغه د سفر په ترڅ کې د طالبانو رئیسالوزرا د ترکمنستان له ولسمشر قربانقلي بردي محمدوف سره لیدلي دي.
د طالبانو د ویاند مرستیال په خبره، په دې لیدنه کې محمدوف د پرمختیايي پروژو پلي کول د افغانستان او ترکمنستان خلکو د هوساینې او سوکالۍ لپاره ګټور بللي دي.
تمه کېږي چې په څو ساعتونو کې د افغانستان له لارې پاکستان او هند ته د ترکمنستان د ګازو پایپ پروژه (ټاپي) پرانېستل شي.
د دغې پروژې لومړۍ برخه د ترکمنستان په خاوره کې بشپړه شوې ده.
طالبانو هم په هرات کې چهارشنبه د وږي ۲۱مه د دغې پروژې د پرانېستې مراسمو لپاره رخصتي اعلان کړې ده.
