د طالبانو ادعا: د ټاپي د ګازو د نللیکې د غځولو کار د پرمختګ په حال کې دی

۸صبح، کابل: طالبانو ادعا کړې چې په هرات ولایت کې د ټاپي د ګازو نللیکې د جوړولو چارو پرمختګ کړی دی.

د طالبانو د ویاند مرستیال حمدالله فطرت سه‌شنبه د وري پر ۱۱مه، په یوه پیغام کې ادعا کړې چې تر اوسه  د ټاپي د ګازو نللیکه ۲۵ کیلومټره غځول شوې ده.

هغه زیاته کړې چې د ۱۲۰ کیلومترو په اوږدوالي بله سیمه هم د دې نللیکې د کار د دوام لپاره چمتو شوې ده.

د ټاپي پروژې عملي کار د ترکمنستان او طالبانو ترمنځ  د ۱۴۰۴ کال په وږي میاشت کې پیل شوی و.

ټاپي پروژه د ترکمنستان طبیعي ګاز د افغانستان او پاکستان له لارې هند ته لېږدوي.

دا پروژه د ترکمنستان له خاورې د ۱۵۰ کیلومټرو تر تېرېدو وروسته له هرات ولایت سره نښلول کېږي.

د ترکمنستان چارواکو تر دې وړاندې ویلي وو چې د ټاپي د ګازو نللیکه به د ۲۰۲۶ کال تر نیمایی پورې هرات ولایت ته ورسېږي.