۸صبح، کابل: طالبانو اعلان کړي، ۳۳۷ افغانې کډوالې کورنۍ چې ټولټال ۱۹۰۱ کسان کېږي، له ګاونډیو هېوادونو افغانستان ته راستنې کړل شوې دي.
د طالبانو د ویاند مرستیال، حمدالله فطرت، شنبه د چنګاښ پر ۱۳مه، په خپره کړې خبرپاڼه کې ویلي چې یوازې د تورخم له لارې ۳۰۴ کورنۍ چې ۱۵۶۰ کسان پکې شامل دي، هېواد ته راغلې دي.
د خبرپاڼې له مخې، ۱۵ کورنۍ د کندهار د سپین بولدک له لارې، ۱۶ کورنۍ د هرات د اسلام کلا له لارې او دوه کورنۍ د هلمند د بهرامچې له لارې افغانستان ته راستنې شوې دي.
دا په داسې حال کې ده چې د راپورونو له مخې، له ګاونډیو هېوادونو، په ځانګړې توګه له پاکستانه، د افغان کډوالو جبري ستنېدو په افغانستان کې د کارموندنې او استوګنې ستونزې لا پسې زیاتې کړې دي.
