۸صبح، کابل: په افغانستان کې د ملګرو ملتونو مرستندویه پلاوي (یوناما) خبرداری ورکړی چې لا هم د زلزلهځپلو اړتیاوې پراخې دي او د ژمي په رانږدې کېدو سره ښايي بشري وضعیت نور هم ترینګلی شي.
یوناما پنجشنبه د وږي پر ۲۷مه په خپله اېکس پاڼه کې لیکلي چې په افغانستان کې د ملګرو ملتونو د سرمنشي ځانګړې استازې روزا اوتنبایوا په کونړ کې له زلزلهځپلو کورنیو سره تر لیدنې وروسته ټينګار کړی چې نړیواله ټولنه او مرستندویه بنسټونه دې د ځپل شویو اړتیاوو د برابرولو لپاره بېړني ګامونه پورته کړي.
د نوموړې په خبره، خوراکي توکي او روغتیايي خدمات د زلزلهځپلو بېړنۍ اړتیاوې دي.
اوتنبایوا ویلي چې په مرستو کې ځنډ ښايي په را روان ژمي کې جدي پایلې ولري.
دا په داسې حال کې ده چې اوتنبایوا د ملګرو ملتونو د امنیت شورا په ناسته کې خبرداری ورکړی چې د بشردوستانه مرستو په بودیجې کې تر ۵۰ سلنې کمښت او په مرستندویه بنسټونو کې د ښځينه کارکوونکو پر کار لګېدلي بندیز د مرستې رسونې بهیر ګډوډ کړی دی.
