۸صبح، کابل: په غزنی ولایت کې د طالبانو د امنیه قوماندانۍ ویاند خالد سرحدي وایی، په دغه ولایت کې د یوې ترافیکی پېښې له امله څلور کسان مړه شوی دی.
د طالبانو تر کنټرول لاندې باختر آژانس چهار شنبه د غوی پر ٢مه خبر ورکړ چې د غزني- واغظ پر لاره يو مسافر وړونکى موټر له سړکه واوښت او بيا چپه شو چې له امله يې څلور تنه سپرلۍ مړې شوي دي.
ديوبل خبرله مخې، په يوه بله پيښه کې دکابل-کندهار په لويه لاره دقره باغ ولسوالۍ په اړوند سیمه کې يو بار وړونکي موټر له دوو مسافر وړونکو موټرونو سره ټکر کړى او په دې پيښه کې اووه تنه ټپيان شوي دي.
طالبانو دغه راز ویلي دي چې دا دوه جلا پېښې د موټر چلوونکو د بې احتیاطۍ له امله شوې دي.
دا په داسې حال کې ده، چې په افغانستان کې د معیاري سړکونو د نشتوالي او ترافیکي قوانینو ته د نه پاملرنې له امله هر کال ترافیکي پېښې د ګڼو کسانو ژوند اخلي.
