۸صبح، غزني: د غزني ولایت د روضې کوتل په سیمه کې د یوې ترافیکي پېښې له امله دوه کسان مړه شوي او د ۱۱ ښځو په ګډون ۲۹ تنه نور ټپیان دي.
د طالبانو تر کنټرول لاندې د غزني ملي ټلوېزیون د یکشنبې پر سهار د غبرګولي پر ۲۴مه راپور ورکړی چې دا ترافیکي پېښه تېره شپه شاوخوا ۱۰ بجې شوې ده.
د راپور له مخې، په غزني کې د طالبانو د امنیه قوماندانۍ ویاند ابوخالد سرحدي ویلي چې د دې پېښې د اتو ټپیانو وضعیت نازک دی.
هغه ویلي چې په دې ترافیکي پېښه کې یو مسافر وړونکی موټر له یوه ټریلر ډوله بار وړونکي موټر سره جنګېدلی دی.
ځایي طالبانو ویلي چې د دغې ترافیکي پېښې ټپیان د غزني ولایتي روغتون ته لېږدول شوي دي.
د شپې تیاره او د موټر چلوونکو بېاحتیاطي د دې ترافیکي پېښې اصلي لاملونه بلل شوي دي.
دا په داسې حال کې ده چې په تېرو دوو ورځو کې د هېواد په بېلابېلو سیمو کې ترافیکي پېښو د یو شمېر خلکو ژوند اخیستی دی.
د سړکونو خرابوالی، د موټر چلوونکو بېاحتیاطي او د ترافیکي اصولو نه مراعات کول په هېواد کې د ترافیکي پېښو اصلي لاملونه ګڼل کېږي.
