۸صبح، کابل: طالبانو ویلي چې پاکستان د سهار شاوخوا درې بجې د کونړ ولایت پر نورګل ولسوالۍ او د پکتیکا ولایت پر برمل ولسوالۍ هوايي بریدونه کړي دي.
د طالبانو د ویاند مرستیال حمدالله فطرت دوشنبه د وږي پر ۳۰مه، ویلي چې په دغو بریدونو کې د ملکي وګړو کورونه او عامه تاسیسات بمبار شوي دي.
فطرت زیاته کړې چې د دغو بریدونو په پایله کې د یوې کورنۍ درې غړي وژل شوي او څلور نور ټپیان شوي دي.
د طالبانو د خبرپاڼې له مخې، په وژل شویو او ټپیانو کې ښځې او ماشومان هم شامل دي.
د پکتیکا ولایت په برمل ولسوالۍ کې هم د رخه او تورکنډي په سیمو کې دوه ځایونه بمبار شوي دي.
د طالبانو په وینا، په دغو بریدونو کې یو دوکان او یو کور ویجاړ شوي؛ خو مرګژوبله یې نه ده اړولې.
