۸صبح، کابل: د پاکستان د خېبرپښتونخوا ایالت ګمرک د خوړو نړیوال پروګرام (WFP) هغو ۲۶ لاريو ته چې د تورخم پر لاره ولاړې وې او خوراکي توکي او اړین مواد یې لېږدول، اجازه ورکړه چې افغانستان ته واوړي.
ډان ورځپاڼې دوشنبه د چنګاښ پر ۲۲مه، راپور ورکړی چې د بشري مرستو دغو لېږدوونکو لاریو ته د شپې ناوخته افغانستان ته د تګ اجازه ورکړل شوې ده.
د راپور له مخې، د خېبرپښتونخوا د ګمرک چارواکو ویلي، ورته خبر ورکړل شوی چې ټولو تصفیه شویو باروړونکو موټرو ته افغانستان ته د تګ اجازه ورکړل شوې ده.
دوی زیاته کړې چې دغه کانټینرونه د خوړو نړیوال پروګرام د بشري مرستو یوه برخه ده او افغانستان ته خوراکي توکي او نور اړین مواد لېږدوي.
دا په داسې حال کې ده چې د افغانستان او پاکستان ترمنځ د تورخم دروازه د طالبانو او پاکستان ترمنځ د زیاتېدونکو ترينګلتياوو له امله له څو میاشتو راهیسې تړلې ده.
