پاکستان په خپله خاوره کې امریکا ته له اډو ورکولو ډډه کړې

د پاکستان د بهرنیو چارو وزیر ویلي، اسلام آباد به امریکا ته له افغانستانه د خپلو سرتېرو له وتلو وروسته پوځي اډې ورنکړي. د پاکستان د بهرنیو چارو وزیر شاه محمود قریشي د غبرګولي پر اتلسمه له پاکستانۍ رسنۍ جیو نیوز سره په مرکه کې ویلي، چې هېواد به یې امریکا ته پوځي اډې ورنکړي.
د پاکستان د بهرنیو چارو وزیر په خبره، نوموړي سیاسي ګوندونو ته هم ویلي، اسلام آباد د دې کار نیت نه لري. هغه زیاته کړې چې امریکا د افغانستان د وضیعت د ارزونې په موخه د پوځي اډو په لټه کې ده؛ خو پاکستان به دغه هېواد ته پوځي اډې ورنکړي.
قریشي ټينګار کې چې پاکستان یو سوله ییز افغانستان غواړي، خو هلته ځينې کړۍ شته چې په سیمه کې سوله نه غواړي. د پاکستان د بهرنیو چارو وزیر ویلي، اسلام آباد غواړي چې د بهرنیو ځواکونو له وتلو سره هممهاله د سولې خبرې هم روانې وي.
نوموړي زیاته کړې، اوس نړۍ پاکستان د سولې په بهیر کې خڼډ نه بولي او ویلې یې دي، چې پاکستان باید په دغه بهیر کې د خپلو ګټو په لټه کې وي.
له دې مخکې داسې راپورونه وو، چې له افغانستانه د امریکایي ځواکونو له وتلو سره هممهاله به په پاکستان کې د امریکا پوځي اډې جوړې شي؛ خو اوسمهال د دغو اډو د جوړېدو په تړاو د امریکا او پاکستان ترمنځ خبرې په ټپه درېدلي دي. همدارنګه ځينې راپورونه شته چې د ډېورند کرښې هغې غاړه ته د امریکايي اډو د جوړېدو چارې روانې دي.
له بلې خوا، ځینې راپورونه وایې چې اوسمهال په پاکستان کې د امریکا د پوځي اډو د جوړېدو په تړاو خبرې روانې دي او له پاکستان سره په دې اړه کې د معاملې امکان شته.
د امریکا د ملي امنیت شورا سلاکار جیک سالیوان هم منلې، چې له پاکستان سره یې د پوځي او اطلاعاتي همکاریو په تړاو خبرې هیله بښوونکې دي. سالیوان ویلي، چې دا خبرې له پوځي، اطلاعاتي او دیپلوماتیکو لارو شوې دي ترڅو ډاډمن شي، چې داعش او القاعدې ته د امن په ځای بدل نه شي او امریکا ته ترې کوم ګواښ نه وي.