۸صبح، کابل: د پاکستان طبي او د غاښونو د طب شورا ویلي، هغه پاکستانیان چې د افغانستان په طبي پوهنتونونو او روغتیايي مرکزونو کې زدهکړې کوي، له فراغت وروسته به د دغه هېواد په طبي ازموینه کې د ګډون اجازه ونه لري.
د دغې شورا د خبرتیا له مخې چې سهشنبه د زمري پر ۱۳مه خپره شوې، راغلي چې د افغانستان طبي او د غاښونو طبي موسسې دا مهال د پاکستان د تایید شویو مرکزونو په نوملړ کې نه شته او د دغو مرکزونو د فارغانو اسناد به په پاکستان کې د طبابت جواز د ترلاسه کولو لپاره معتبر نه وي.
دا پرېکړه هغه پاکستاني محصلان رانغاړي چې دا مهال په افغانستان کې د طب او غاښونو په څانګو کې زدهکړې کوي.
همدارنګه هغه کسان چې غواړي په راتلونکي کې د افغانستان په پوهنتونونو کې د دغو څانګو لپاره نوملیکنه وکړي، هم د دغې پرېکړې تر اغېز لاندې دي.
د پاکستان طبي شورا ټینګار کړی چې د دغو مقرراتو په اړه به د استثنا یا معافیت هېڅ ډول غوښتنه ونه منل شي.
