۸صبح، کابل: پاکستان ۱۸ افغان محصلانو ته چې ۱۱ یې د طب پوهنځي او شپږ نور یې ستاژران دي، امر کړی چې په ۲۴ ساعتونو کې له دغه هېواده ووځي.
هغه لیک چې چهارشنبه د وږي پر ۱۸مه ۸صبح ورځپاڼې ته استول شوی، پکې راغلي چې د پاکستان د طب او د غاښونو شورا د دغو افغان محصلانو د ستنولو امر کړی دی.
دغو ۱۸ افغان محصلانو د لاهور په شیخ زاید پوهنتون کې زدهکړې کولی او د اداري او قانوني پړاوونو تر تېرولو وروسته اړ دي چې له پاکستانه ووځي.
د دغه سند له مخې، محصلانو ته ویل شوي چې د زدهکړو چارې ودروي، د اوسېدو ځای پرېږدي او د اداري پړاوونو د بشپړولو او د اړتیا وړ اسنادو ترلاسي په موخه د محصلانو چارو برخې ته ورشي.
په دغه سند کې ټینګار شوی ې د پاکستان د طب او غاښونو شورا د لارښوونو له مخې دې دغو محصلانو ته په ټولګیو کې د ګډون، منلو، انتقال یا هر ډول ښوونیزو او اداري فعالیتونو د دوام اجازه نه ورکول کېږي.
له دې مخکې هم د پاکستان طبي شورا هغو افغان محصلانو ته چې د دغه هېواد په پوهنتونونو کې پر زدهکړو بوخت دي، خپل هېواد ته د تللو امر کړی و.
دغې شورا له پاکستاني پوهنتونونو غوښتي و چې د نویو افغان محصلانو له نوملیکنې ډډه وکړي.
