۸صبح، کابل:پاکستاني رسنیو راپور ورکړی چې د پاکستان د طالبانو یو لوړ پوړی قوماندان حفیظ الله مبارز د پاکستان او افغانستان په سرحدي سیمو کې وژل شوی دی.
د اېکسپریس ټریبیون ورځپاڼې شنبه د وری پر ۲۳مه راپور ورکړ چې د پاکستان پوځ حفیظ الله مبارز چې په «کوچوان» مشهور و او د ټي ټي پي مهم کس ګڼل کېده، وژلی دی.
د دغه راپور له مخې، کوچوان/مبارز د خیبر پښتونخوا ایالت د ملاکنډ په سیمه او د افغانستان په کونړ ولایت کې د ټي ټي پي د ځانګړو ځواکونو د قوماندې مسوولیت پرغاړه درلود.
د پاکستان امنیتي سرچینو دې رسنۍ ته ویلي چې هغه د پاکستاني او امریکایي امنیتي ځواکونو پر وړاندې د مرګونو بریدونو په پلانولو او ترسره کولو کې مهم رول لوبولی دی.
دې رسنۍ دغه راز زیاته کړې چې کوچوان د پاکستان په خاوره کې د پوځيانو او ملکي وګړو پر وړاندې په څو ترهګریزو عملیاتو کې ګډون کړی و.
د دغه راپور له مخې، د ټي ټي پي دغه قوماندان د پاکستان امنیتي او قضايي ادارو ته مطلوب و او حکومت د هغه د نیولو لپاره د ۱۰ میلیونه کلدارو جایزه ټاکلې وه.
پاکستاني رسنیو دغه راز د امنیتي چارواکو په حواله راپور ورکړی چې کوچوان ډېورنډ کرښې ته څېرمه د پاکستاني ځواکونو پر وړاندې په ګڼو بریدونو کې هم لاس درلود.
پاکستان په وار وار ادعا کړې چې د پاکستان د طالبانو تحریک د افغانستان خاوره د دغه هېواد د امنیتي ځواکونو پر وړاندې د بریدونو لپاره کاروي، هغه ادعا چې تل د افغان طالبانو له خوا رد شوې ده.
