۸صبح، کابل: ډان ورځپاڼې د ملګرو ملتونو د راپور په حواله لیکلي چې تحریک طالبان پاکستان (ټي ټي پي) په افغانستان کې تر ټولو لویه فعاله ترهګره ډله ده.
دې رسنۍ چهارشنبه د سلواغې پر ۲۲مه، راپور ورکړی چې «ټيټيپي» له سيمه ييزې کچې پر اخوا ګواښ د بدلېدو په حال کې ده.
د ملګرو ملتونو د امنیت شورا د څارنې په راپور کې راغلي چې تحریک طالبان پاکستان په افغانستان کې له ترجیحي چلند څخه برخمنه ده.
په راپور کې ویل شوي: «په افغانستان کې واکمنو چارواکو په عملي توګه لا هم د بېلابېلو ترهګرو ډلو په ځانګړې توګه د تحریک طالبان پاکستان لپاره، مساعد چاپېریال برابر کړی دی.»
په دغه راپور کې د ټي ټی پي او د نورو وسلهوالو ډلو ترمنځ عملیاتي فضا په مستقیمه توګه پرتله شوې او دا توپیر د پاکستان د امنیتي وضعیت له جدي خرابوالي سره تړلی بلل شوی دی.
د ډان ورځپاڼې د راپور له مخې، تېر کال په ټي ټی پي پورې د منسوبو څه باندې درې زره او ۵۰۰ ترهګریزو بریدونو له ډلې، له دوه زره او ۱۰۰ څخه ډېر بریدونه د کال په دویمه نیمايي کې ثبت شوي دي.
ویل کېږي چې ټي ټي پي د افغانستان په ختیځو او سوېل ختیځو ولایتونو، لکه کونړ، ننګرهار، خوست، پکتیکا (په ځانګړې توګه برمل ولسوالۍ) او پکتیا کې پراخ حضور لري.
خو طالبان په افغانستان کې د ترهګرو ډلو حضور ردوي.
