۸صبح، کابل: طالبانو پاکستان ته په خصوصي پیغامونو کې ویلي، چې د دغې ډلې مشر ملاهبتالله اخوندزاده پاکستاني طالبانو ته د پاکستان په خاوره کې د بریدونو د کولو په تړاو خبرداری ورکړی دی.
ایکسپریس ټریبیون ورځپاڼې دوشنبه د غبرګولي پر ۱۱مه، د پاکستان د امنیتي سرچینو په حواله په یوه راپور کې ویلي چې طالبانو هڅه کړې پاکستان د اسلاماباد د امنیتي اندېښنو په لېرې کولو کې د خپلې رېښتینولۍ په تړاو قانع کړي.
د راپور له مخې، د طالبانو مشر د پاکستاني طالبانو جنګیالیو ته ویلي که د پاکستان په خاوره کې خپل بریدونه ونه دروي، د طالبانو ملاتړ به له لاسه ورکړي.
خو یوې امنیتي سرچینې ایکسپریس ټریبیون ته ویلي، چې پاکستان دا ګام کافي نه ګڼي او په دې باور دی چې دا کار په شته وضعیت کې د ریښتوني بدلون د راوستلو لپاره لازم عملي اړخ نه لري.
په راپور کې راغلي، هغه چارواکي چې له دې موضوع خبر دي وايي، د پاکستان په اړوندو بنسټونو کې تر ډېره ارزونه دا ده چې د طالبانو وروستۍ ډاډګیرنې د ستونزې د بنسټیز حل پرتله، تر ډېره د نړۍوالو او سیمه ییزو فشارونو د کمولو په موخه ترسره شوې دي.
په دغه راپور کې زیاته شوې، یوه لوړپوړي پاکستاني چارواکي چې د نوم له ښودلو یې ډډه کړې، ویلي: «زموږ ارزونه ښيي چې له افغانستانه د فعالو ترهګرو ډلو پر وړاندې د طالبانو په چلند کې هیڅ د پام وړ بدلون نه دی راغلی.»
دا په داسې حال کې ده چې طالبانو په ځلونو ادعا کړې، چې د اسلاماباد اندېښنو ته د ځواب ویلو لپاره یې بېلابېل ګامونه پورته کړي دي.
له دې سره سره، د پاکستان او طالبانو ترمنځ کړکېچ له څو میاشتو راهیسې دوام لري او کله ناکله د ډیورنډ کرښې په اوږدو کې پوځي نښتو ته هم غځېدلی دی.
