په جلال اباد کې د پاکستان وېزې اخیستو پرمهال د دوولس تنو مړینه

د جلال اباد ښارپه فوټبال لوبغالې کې د پاکستان ويزو د ترلاسه کولو په موخه، د ټوکن اخېستو پر مهال، د ګڼې ګوڼې له امله، دوولس تنه مړه او يوولس نور ټپيان شوي چې ډېری يې ډېر عُمر لرونکې مېرمنې وې.
د ننګرهار د والي ویاند ۸ صبح ته وویل چې د چهارشنبې په سهار د فوټبال لوبغالي ته د پاکستان ویزو د نوبت د ترلاسه کولو په موخه، لسګونو زره تنو د ننوتلو پر مهال، د ډېرې ګڼې ګوڼې له امله، ۱۱ زیات عمر لرونکې مېرمنې مړې او لس مېرمنې او درې نارینه ټپيان شول.
خوګیاڼی زیاتوي چې په ننګرهار کې، د پاکستان کونسلګري د هېواد د اتو ولایتونو استوګنو ته ویزې ورکوي او د کرونایي وضعیت له امله یې له کابو اتو میاشتو راهیسې د ویزو برخه تړلې وه، چې یوه اونۍ مخکې یې بیا فعالیت پیل کړ. د ننګرهار حوزوي د روغتون چارواکو رسنیو ته وويل چې د ۱۲ مېرمنو مړي او ۱۲ ټپیانور وړل شوي چې عمرونه يې د پنځوس او شپيتو کلونو ترمنځ دي. په ټپیانو کې درې نارینه هم دي.
د ننګرهار ولایت اوسېدونکي،د پاکستان د کونسلګرۍ ترڅنګ، ددغه ولایت چارواکي ګرم بولي چې د وېزې اخیستو بهیر په مدیریت کې پاتې راغلي دي.
په جلال اباد کې د پاکستان کونسلګري هم د پېښې په غبرګون کې وېلې چې ګڼ شمېر خلک، د پاکستان کونسلګرۍ مخې ته د ویزې لپاره ټول شوي وو چې د ناسم مدیریت او ګڼې ګوڼې له امله ۱۲ مېرمنې مړې شوې.
خو د ننګرهار د والي ویاند عطاالله خوګیاڼی زیاتوي چې په همدې موخه تر ۳۲۰ زیات نارینه او ښځینه پولیس په دندو ګمارل شوي او لسګونه ملکي مامورینو ته د اداري کار د ترسره کولو دنده ورکړل شوې ده.
په لومړي ځل چې د وېزو د ورکړې بهیر پیل شو، د فساد او نورو ستونزو د مخنیوي په موخه،په فوټبال لوبغالي کې د اطلاعاتو او کلتور او مدني فعالانو یوې کمېټې، د ویزې وېشلو بهیر کې ونډه واخیسته.
خو تېره ورځ مدني فعالینو وېليوو چې نور په دغه بهیر کې ونډه نه لري او حکومتي ادارې به دا چاره په مخ بیايي.
د ویلو ده چې په کابل کې د پاکستان د سفارت په مخکې هم، په سلګونه افغانان- په ورځو ورځو-د وېزې په طمعه ولاړ وي او د وېزې په اخیستو کې په ځلونو د فساد او بډو رپوټونه ورکړل شوي دي.