۸صبح، کندهار: په کندهار کې ځايي سرچینې وايي چې د پاکستان له وروستیو هوايي بریدونو وروسته په کندهار او هلمند کې ځينو کورنیو له احتمالي بریدونو د خوندي پاتې کېدو لپاره خپل کورونه پرېيښي او ځینو نورو پناهځایونه جوړ کړي.
سرچینو یکشنبه د تلې پر ۱۲مه ۸صبح ورځپاڼې ته وویل چې د پاکستان وروستیو هوايي بریدونو د دغو ولایتونو د اوسېدونکو ترمنځ اندېښنې راپارولې او خلک د بریدونو له احتمالي تکراره وېره لري.
د سرچینو په خبره، د هلمند په ګرمسیر ولسوالۍ کې ځينو کورنیو د ځان د خوندیتوب لپاره د ځمکې لاندې پناهځایونه جوړ کړي دي.
په کندهار کې هم ځايي سرچینې وايي چې نظامي مرکزونو ته نږدې ځينو کورنیو له هوايي بریدونو د وېرې له کبله خپل کورونه پرېيښي دي.
د سرچینو په خبره، هغه کوورنه چې نظامي مرکزونو ته نږدې دي، ډېری خلک نه غواړي کرایه یې کړي، ځکه اندېښمن دي چې هسې نه هوايي بریدونه پرې وشي.
هغوی وايي چې د کندهار او هلمند اوسېدونکي له رواني فشار سره مخ دي او وروستیو بریدونو ته په پام د نښتو له بیاپیله اندېښمن دي.
دا په داسې حال کې ده چې څو ورځې مخکې پاکستان د کندهار او هلمند پر ځينو سیمو بمبار وکړ او د سیمهییزو سرچینو په خبره، په دغو بریدونو کې ملکیانو ته مرګ ژوبله اوښتې ده.
