۸صبح، کندهار: په کندهار او هلمند کې ځايي سرچینې وايي چې له دغو دوو ولایتونو سره د کجکي بند برېښنا بشپړه پرې شوې او اوس د دغو ولایتونو اوسېدونکي محدودې ډیزلي برېښنا ته لاسرسی لري.
سرچینو یکشنبه د تلې پر ۱۲مه ۸صبح ورځپاڼې ته وویل چې په کندهار کې د کجکي برېښنا له پرې کېدو وروسته خلک یوازې ډيزلي او لمریزې برېښنا ته لاسرسی لري؛ هغه چې بیه یې لوړه او لاسرسی یې محدود دی.
په هلمند کې یوه سرچینه وايي چې د کجکي برېښنا په پرې کېدو د خلکو ستونزې ډېرې شوې دي.
د لښکرګاه ښار اوسېدونکی شمسالله وايي: «طالبان د کجکي برېښنا په پرې کولو هڅه کوي په راتلونکې کې د برېښنا بیلونو د لګښت لوړولو ته زمینه برابره کړي او د خلکو ترمنځ دا ذهنیت رامنځته کړي چې د دغه بند د برېښنا پر ځای ډیزلي برېښنا ورکوي.»
نوموړي د طالبانو پر دې پرېکړې نیوکه کړې او د کجکي برېښنا د بېرته نښلولو غوښتنه یې کړې ده.
ورته مهال په دغو دوو ولایتونو کې ځايي طالب مسوولانو ویلي چې په کجکي بند کې د اوبو د کمښت له کبله برېښنا پرې شوې ده.
د سرچینو په خبره، اوسمهال د کندهار او هلمند اوسېدونکي په ۲۴ ساعتونو کې په نوبتي ډول درې ساعته برېښنا لري.
