۸صبح، کندهار: په کندهار کې ځايي سرچینې وايي، د دغه ولایت اوسېدونکي چې د چمن له لارې بلوچستان ته سفر کوي، د پاکستاني پولیسو له خوا ترې ناقانونه اخاذي کېږي.
سرچینو سهشنبه د زمري پر ۳۰مه ۸صبح ورځپاڼې ته ویلي چې پاکستاني پولیس له ویزه لرونکو مسافرانو ناقانونه پیسې اخلي.
سرچینو زیاته کړې چې له هر کس څخه له دوو زرو تر لسو زرو کلدارې اخیستل کېږي.
۸صبح ورځپاڼې ته په استول شوې ویډیو کې هم ښکاري چې له یو کس څخه لس زره پاکستانۍ کلدارې اخیستل کېږي.
سرچینو ویلي چې ویزه اخیستل هم ډېره موده نیسي او پاکستان ته تګ ګڼې ننګونې لري.
د یادونې ده چې ډېری افغانان د پاکستان له لوري د ویزو صادرولو بهیر په تړاو شکایت لري.
د هغوی په خبره، په افغانستان کې د پاکستان سفارت د طالبانو او کمیشنکارانو په همغږۍ په لوړه بیه ویزې صادروي.
