۸صبح، کابل: د پاکستان د ولسمشر ویاند مرتضیٰ سولنګي وايي، طالبان چې د «ځانمرګو بریدونو او چاودنو» له لارې واک ته رسېدلي، پاکستان ته د ډیموکراسۍ د درس ورکولو صلاحیت نه لري.
سولنګي د ډیموکراسۍ په اړه د طالبانو د استازو د څرګندونو په غبرګون کې ویلي چې دغه ډله له کلونو بم اېښودنو، د چاودېدونکو توکو په مټ له بریدونو او ځانمرګو بریدونو وروسته په افغانستان کې واک ته ورسېده، خو له دې مخينې سره سره پاکستان ته د ډیموکراسۍ «درس ورکوي».
د پاکستان د ولسمشر ویاند همداراز طالبان د دوحې په هوکړه لیک کې د خپلو ژمنو په ماتولو او د افغان ښځو او نجونو د اساسي ازادیو په له منځه وړلو تورن کړي دي.
هغه زیاته کړې چې دغه ډله لا هم په افغانستان کې د قومي او مذهبي لږکیو ځورونې او تعقیب ته دوام ورکوي.
هغه ویلي: «دا یو ډېر لوی تناقض دی؛ هغه رژیم چې خپل مشروعیت له ټوپکه اخلي، جرئت کوي چې د هغه هېواد ډیموکراتیک مشروعیت تر پوښتنې لاندې راولي چې د میلیونونو وګړو په اراده رامنځته شوی دی.»
دا څرګندونې په داسې حال کې کېږي چې د طالبانو د بهرنیو چارو وزیر امیرخان متقي د دوشنبې په ورځ د مسکو فارمټ په غونډه کې ویلي وو چې د کابل او اسلاماباد اختلافات د خبرو او ډیپلوماسۍ له لارې حل کېدای شي؛ خو د هغه په وینا، پاکستان د سیاسي تفاهم پر ځای «د زور ژبه» غوره کړې ده.
