د پاکستان د کـورنیـو چارو وزیر: د طالب مشرانو کورنۍ په پاکستان کې اوسېږي

په وروستیو ورځو کې د اسلام آباد او کابل ترمنځ لفظي شخړې زیاتې شوې دي. په تازه مورد کې بیا د یوه پاکستاني چارواکي اعتراف د کابل له خوا ستایل شوی دی.
د پاکستان د کورنیو چارو وزیر شیخ رشید احمد، په یوه تلویزیوني مرکه کې ویلي چې د طالب مشرانو کورنۍ په پاکستان کې اوسېږي او ددغې ډلې د ټپيانو درملنه د نوموړي هېواد په روغتونونو کې کېږي.
شیخ رشید احمد له جیونیوز سره په مرکه کې ویلي چې د طالبانو ډلې د مشرانو کورونه د پاکستان په میراواد، لوی میر، باراکو او ترنول سیمو کې دي.
د پاکستان د کورنیو چارو وزیر په افغانستان کې اوږدې جګړې ته په اشارې سره ویلي د پاکستان لومړی وزیر عمران خان د افغانستان د ستونزې د اواري لپاره یوه نړیواله تګلاره وړاندې کړې ده. هغه همداراز زیاته کړې چې امریکا په افغانستان کې په خپل شل کلن حضور سره آن یوه د ګوګړو فابریکه هم نه ده جوړه کړې او یوازې د جګړې د دوام لامل شوې ده.
د پاکستان د کورنیو چارو وزیر دا تور چې طالبان او اسامه بن لادن په پاکستان کې پټ وو رد کړ او وې ویل: ښايي هر ډول تور ولګول شي.
شیخ رشید احمد له طالبانو غوښتي چې د پاکستاني طالبانو تحریک ته د افغانستان له خاورې ددغه هېواد پرخلاف د عملیاتو اجازه ورنه کړي. د نوموړي په وینا، هماغه شان چې پاکستان هڅه کوي چې افغانستان امن وي، د طالبانو ډله هم باید د پاکستاني طالبانو تحریک ته له افغانستانه ددغه هېواد پرخلاف د عملیاتو اجازه ورنه کړي.
د پاکستان د کورنیو چارو وزیر همداراز وویل چې تر یوې میاشتې پورې له افغانستان سره د دغه هېواد په پولو کې د اغزن تار بهیر بشپړېږي. اخوا، د طالبانو ډلې ویاند ذبیح الله مجاهد له ۸صبح ورځپاڼې سره په خبرو کې د شیخ رشید احمد خبرې رد کړې دي. د هغه په وینا په هېواد کې پراخه جګړه روانه ده او په پاکستان کې د دوی د مشرانو او مسوولینو اوسېدل حقیقت نه لري، ځکه جګړه مشري او د مسوولینو شته والی غواړي. هغه زیاته کړې چې افغان کډوال په پاکستان کې اوسېږي او ښايي په دوی کې د طالبانو پلویان هم وي.
د پاکستان د کورنیو چارو د وزیر دا څرګندونې د افغان چارواکو له غبرګون سره مخامخ شوې دي. د افغانستان د ملي امنیت سلاکار حمد الله محب د چنګاښ په اوومه نېټه ویلي چې له طالبانو د اسلام آباد د ملاتړ د افشا کولو له امله د پاکستان د کورنیو چارو د وزیر ستاینه کوي. محب زیاته کړې چې لانورو دغه ډول پاکستانیانو ته اړتیا لرو چې پر افغانستان د پاکستان د کړنو په اړه خبرې وکړي. د پاکستان د کورنیو چارو د وزیر ځینې څرګندونې د افغانستان د بهرنیو چارو وزارت له غبرګون سره مخامخ شوې دي.
د هېواد د بهرنیو چارو وزارت ویلي چې د پاکستاني طالبانو تحریک په هېڅ ډول په افغانستان کې فعالیت نه لري.
دغه وزارت زیاته کړې چې د پاکستاني طالبانو تحریک د ملي امنیت د سیاست له مخې، د نورو ترهګرو ډلو ترڅنګ په افغانستان او سیمه کې د سولې، ثبات او سوکالۍ مخالف پېژندل شوی او افغان دولت له دې ډلې سره د نورو ترهګرو ډلو په شان له توپیر پرته مبارزه کوي. که څه هم په قطر کې د افغان دولت او طالبانو ترمنځ د مذاکراتو خبره کېږي خو په دې وروستیو کې د افغانستان په بېلابېلو ولایتونو کې جګړې زور اخیستی دی.