۸صبح، پکتیکا: د پکتیکا د یحیاخېلو ولسوالۍ اوسېدونکو په خپل لګښت یو روغتیايي مرکز او یو پل جوړ کړی دی.
سرچینو پنجشنبه د وږي پر ۱۲مه ۸صبح ورځپاڼې ته وویل چې د یحیاخېلو ولسوالۍ اوسېدونکو یو روغتیايي مرکز او په حاجیانو کلي کې د موټرو د تګراتګ لپاره یو پل رغولی دی.
د سرچینو په خبره، پر دغو دوو پروژو نږدې دوه میلیونه افغانۍ لګښت راغلی دی.
سرچینو زیاته کړې چې د یحیاخېلو روغتیايي مرکز معیاري ودانۍ نه لرله او خونې یې کمې وې چې له کبله ناروغان او پایوازان له ګڼو ستونزو سره مخ و.
له دې مخکې هم د همدې ولسوالۍ اوسېدونکو په خپل لګښت پر څو کیلومتره سړک جغل اچولی و.
