په بنجشیر ولایت کې یو شمېر پخواني څارنوالان ادعا لري چې پر هېواد د طالبانو له واکمنېدو وروسته، په وېره او په کورونو کې د بندي په توګه ژوند کوي. له بلې خوا، د طالبانو د چارسمبالي حکومت مسوولین د دوی له خوا عمومي بښنې ته په اشارې سره وايي چې د ټولو امنیت خوندي کوي.
احمد (مستعار نوم) چې له څو کلونو راهیسې یې د پنجشیر ولایت په استیناف محکمه کې د څارنوال په توګه کار کړی دی. نوموړی تراوسه هم په رسمي توګه له خپلې دندې نه دی ګوښه شوی.
احمد له ۸صبح ورځپاڼې سره په خبرو کې وویل چې د خوشي شویو بندیانو له خوا د امنیتي ګواښونو او د څارنوالانو او قاضیانو په اړه د طالبانو د چارسمبالي حکومت د پوځیانو د منفي لیدلوري له امله، له څه پاسه څلورو میاشتو راهیسې چې بې برخلیکه وضعیت او په کور کې د بندي په توګه شپې ورځې تېروي. نوموړی زیاتوي، خوشي شوي بندیان په دې اند دي چې څارنوالانو د شخصي عقدو له مخې دوی په بند محکوم کړي وو.
احمد جوته کړه: «څه د پاسه څلور میاشتې کېږي چې د وروستیو بدلونونو له امله بې برخیلکه یوو، یو شمېر مخکیني بندیان چې خوشي شوي د غچ اخیستو په لټه کې دي. موږ په کورني بند کې ژوند کوو او له څه مودې وروسته دې ته اړ کېږو چې خپل کورونه بدل کړو.»
له بلې خوا، زرمینه (مستعار نوم) چې له څو کلونو راهیسې یې په پنجشیر کې د څارنوالې په توګه دنده ترسره کړې، هغه هم له ۸صبح سره په خبرو کې وایي: «د امنیتي ګواښونو ترڅنګ زموږ د څلورو میاشتو معاشونه نه دې راکړل شوي، د نورو ادارو په شان، په څارنوالیو کې ښځو ته د کار کولو اجازه نه ورکول کېږي. د طالبانو له چارسمبالي حکومته غواړو چې موږ له بې برخلیک وضعیت بهر کړي او همداراز که نړیواله ټولنه زموږ امنیت ته پام ونه کړي، ټول به د لازیاتو څارنوالانو د له لاسه ورکولو شاهدان وي.»
دغه څارنوالان ادعا کوي چې تراوسه څو ځله د خپل امنیت د خوندیتوب او دندو ته د ستنېدو لپاره طالب چارواکو ته ورغلي، خو طالبانو ورته ویلي چې د مخکیني حکومت څارنوالان او قاضیان د دوی په حکومت کې ځای نه لري.
له بلې خوا، د طالبانو د چارسمبالي حکومت د کورنیو چارو وزارت ویاند سعید خوستی د دغو څارنوالانو د امنیت په هکله وایي چې طالبانو عمومي عفوه اعلان کړې او د څارنوالانو په ګډون د ټولو امنیت خوندي کوي. هغه زیاتوي: «د مخکیني حکومت کارکوونکو ته ډاډ ورکوو چې اسلامي امارت عمومي عفوه اعلان کړې او د دوی امنیت خوندي کوو، فرصت ورکوو چې په هېواد کې ژوند وکړي او که له کوم لوري ورته ستونزه رامنځته شي، موږ ځواب ویوونکي یوو.»
په دې لړ کې د هېواد په لویه څارنوالۍ کې د ښځو د ځورونې د مخنیوي برخې عمومي رییسه مشتري دانش هم د خوشي شویو بندیانو له خوا له لوړو ګواښونو سره د دغه بنسټ د کارکوونکو د مخامخ کېدو په اړه د اندېښنې په څرګندولو سره وايي چې پر هېواد د طالبانو له واکمنۍ وروسته، په ټول هېواد کې کابو شل تنه څارنوالان د ناپېژانده وسله والو له خوا وژل شوي دي. د مېرمن دانش په وینا، تراوسه د طالبانو چارسمبالي حکومت د څارنوالانو د وژل کېدو دوسیې نه دي تعقیب کړې.
هغې وویل: «اسلامي امارت په لومړي ګام کې بندیان له کوم قید او شرط پرته خوشي کړل، د دوی خلاصون د څارنوالانو په وړاندې لوی ګواښ دی. له بده مرغه چې له هغه وخت راهیسې مو په هدفي وژنو کې خپل کابو شل همکاران له لاسه ورکړي او اسلامي امارت د دوی دوسیو ته هېڅ پام نه دی کړی او ددغو وژنو عاملین یې نه دي نیولي.»
دا اندېښنې په داسې حال کې مطرح کېږي چې د مخکیني حکومت له پاشل کېدو وروسته، طالبانو ښارونو ته په رسېدو، د بندیانو پرمخ د زندانونو دروازې پرانیستې؛ دې کار د څارنوالانو او قاضایانو اندېښنې زیاتې کړې دي.
