۸صبح، بلخ: په مزارشريف کې سر چينې وايي چې د دغه ولایت د برېښنا شبکه په موقتي ډول د ازبیکستان د وارداتي برېښنا له شبکې سره نښلول شوې ده.
دغو سرچینو د دوشنبه د وږي پر ۹مه ۸صبح ته ویلي چې د مزارشریف د ځینو برخو برېښنا د ازبیکستان له وارداتي برېښنا سره نښلول شوې ده.
د طالبانو تر کنټرول لاندې د بلخ برېښنا حوزې یوې سرچینې ویلي چې د مزارشریف د مهمو او حساسو سیمو برېښنا د ازبیکستان له وارداتي شبکې سره نښلول شوې ده.
دې سرچینې زیاته کړې چې اوس مهال یوازې د ابنسینا ساحوي روغتون او یو شمېر ادارې له دې شبکې سره نښلول شوې دي او د ښار په بېلابېلو سیمو کې به برېښنا په نوبتي ډول ووېشل شي.
د سرچینې په وینا، که د ترکمنستان وارداتي برېښنا بېرته ونه نښلول شي، د برېښنا د کمښت له امله به په ښار کې د برېښنا نوبتي وېش دوام وکړي.
دا په داسې حال کې ده چې له تېر ماښام راهیسې د ترکمنستان د وارداتي برېښنا په پرېکېدو سره بلخ، سمنګان، جوزجان، سرپل، بادغیس او د هرات ځینې برخې بې برېښنا شوې دي.
