۸صبح، کابل: په ملګرو ملتونو کې د قطر دایمي استازې شیخ علي بنت احمد بن سیف الثاني په سیاسي چارو کې د دغه سازمان د سرمنشي له مرستیالې روزمیري دیکارلو سره لیدلي دي.
د قطر د بهرنیو چارو وزارت چهارشنبه د لړم پر ۹مه په یو خپاره کړي بیان کې لیکلي چې دا کتنه د ملګرو ملتونو په دفتر کې شوې ده.
د بیان پر بنسټ، دواړو خواوو د دوحې درېیمې ناستې د پاېلو په اړه چې څه موده مخکې جوړه شوې وه، خبرې کړې دي.
د قطر د بهرنیو چارو وزارت په خبره، د دوحې درېیمې ناستې پاېلې به پر څلورمې غونډې هم اغېز پرېباسي.
د دوحې څلورمې جوړېدونکې غونډې د نېټې په اړه څه ویل شوي نه دي.
د يادونې ده چې د روان لمريز کال په سرطان مياشت کې د قطر په پلازمېنه دوحه کې د ملګرو ملتونو په کوربتوب د افغانستان لپاره د هېوادونو ځانګړو استازو او طالبانو په ګډون غونډه جوړه شوې وه.
طالبانو هغه مهال دا غونډه مثبته ارزولې وه.
ملګرو ملتونو د طالبانو په غوښتنه دې ناستې ته د افغان ښځو په استازیتوب چاته بلنه ورکړې نه وه.
د ملګرو ملتونو دا کړنه د بشري حقونو د بنسټونو او د ښځو حقونو د فعالانو له توند غبرګون سره مخ شوه.
