۸صبح، کابل: د ملګرو ملتونو پراختیايي پروګرام (UNDP) له نړیوالې ټولنې غوښتي چې افغان زلزله ځپلو ته د سرپناه برابرولو په موخه خپلې مرستې پراخې کړي.
نوموړي بنسټ یکشنبه د تلې پر ۲۰مه په خپله اېکس پاڼه کې لیکلي چې د دې زلزلې له کبله ۳۱ زره کسان بې ځایه شوي او څه باندې شپږ سوه او ۴۹ زره ټنه ویجاړی پاکولو ته اړتیا لري.
په افغانستان کې د ملګرو ملتونو د پراختیايي پروګرام استازي استیفن رودریګز ویلي چې لا هم ځپل شویو سیمو ته لاسرسی محدود دی.
نوموړي چې دا سیمې یې لیدلي، وضعیت یې ډېر ناوړه بللی او ویلې یې دي چې په ځينو سیمو کې د ویجاړۍ کچه ډېره پراخه ده.
رودریګز د ژمي په نږدې کېدو اندېښنه ښودلې او زیاته کړې یې ده چې خلک د تودولو توکو، کمپلو، انرژۍ او خوراکي موادو ته شدیده اړتیا لري.
نوموړي ټينګار کړی چې په سملاسي توګه دې ځپل شویو کسانو ته انتقالي پناه ځایونه جوړ شي.
د هغه په خبره، ملګري ملتونه به د پراخو نړیوالو مرستو ترلاسي لپاره هڅې وکړي څو تړل شوې لارې ورغول شي، له ځپل شویو سیمو ویجاړی پاک او زلزله ځپلو ته بشردوستانه مرستې ورسېږي.
د یادونې ده چې کابو شپږ اوونۍ وړاندې د افغانستان په ختیځ کې د یوې مرګونې زلزلې په پایله کې څه باندې ۲۲۰۰ کسان مړه او له ۳۶۰۰ ډېر ټپیان شول.
د نړیوالو بنسټونو په وینا لا هم ګڼ کورونه ویجاړ دي او ځپل شوي په پرانېستې چاپېریال یا تر خیمو لاندې ژوند کوي.
