۸صبح، نورستان: په نورستان کې ځايي سرچینې وايي چې په دغه ولایت کې یوه ښځه او دوه نارینه د شخصي دوښمنۍ لامله په ډزو وژل شوي دي.
سرچینو یکشنبه د سلواغې پر ۲۱مه ۸صبح ورځپاڼې ته ویلي چې دا پېښه د نورستان نورګرام ولسوالۍ په «میري» سیمه کې شوې ده.
د سرچینو په وینا، دا پېښه د دوو کورنیو ترمنځ د شخصي ترپګنۍ په پایله کې رامنځته شوې ده.
سرچینو زیاته کړې چې د پېښې عاملان له سیمې تښتېدلي دي.
دغه راز، طالبانو هم د پېښې پخلی کړی او په دې تړاو یې د څېړنو د پیل خبره کړې ده.
دا په داسې حال کې ده چې څه موده وړاندې په خوست کې هم د یوې کورنۍ ۱۳ غړي وژل شوي وو.
