د ایران ولسمشر مسعود پزشکیان ویلي، هېواد به یې له خپلو پولو دفاع وکړي، خو د جګړې د پراخولو په لټه کې نه دی.
د ایراني رسنیو د راپورونو له مخې، پزشکیان سه شنبه د اګست پر ۴مه، وویل چې ایران په سیمه کې د ترينګلتيا د زیاتېدو غوښتونکی نه دی، خو د ځان د دفاع لپاره به له خپل ټول ځواکه کار واخلي.
هغه زیاته کړه: «په دغو شرایطو کې باید داسې ټولنه جوړه کړو چې دښمن ونه شي کړای پکې نفوذ وکړي، هغه ګډوډه او له منځه يې یوسي.»
دا څرګندونې په داسې حال کې شوې چې د تهران او واشنګټن ترمنځ د خبرو د دوام په اړه ضدو نقيض راپورونه خپاره شوي دي.
د امریکا ولسمشر ډونالډ ټرمپ ویلي چې له تهران سره خبرې روانې دي او دا یې د پنځه میاشتنۍ جګړې د پای ته رسولو لپاره «وروستی فرصت» بللی دی.
ټرمپ له هغې وروسته چې ایران له امریکا سره د خبرو راپورونه رد کړل، تهران یې په «نه باور کېدونکې دوه ګونې تګلارې» تورن کړ او ویې ویل چې ایراني چارواکي له یوې خوا د خبرو غوښتنه کوي او له بلې خوا له امریکا سره خبرې ردوي.
