۸صبح، کابل: «له پولیو پاک افغانستان» بنسټ وايي چې د پولیو دوه څاڅکي واکسین ماشومان له دغه ویروسه خوندي کولی شي او له همدې کبله له پنځو کالو کم عمره ماشومانو ته په هر پړاو کمپاین کې اړین دي.
نوموړي بنسټ پنجشنبه د تلې پر ۹مه په اېکس پاڼه کې لیکلي چې د پولیو واکسین دوه کوچني څاڅکي ماشومان د دغه ویروس پر وړاندې له ستر ګواښه ژغوري.
پولیو واکسین د ماشومانو د ګوزڼ د مخنیوي مهمه لار ده، خو په افغانستان کې د واکسیناسیون د بېلابېلو کمپاینونو له ترسراوي سربېره، بیا هم د پولیو مثبتې پېښې ثبت شوې دي.
له پولیو پاک افغانستان بنسټ له کورنیو او د ټولنې له نورو غړو غوښتي چې د واکسین له ډلو سره همکاري وکړي، څو ډېر ماشومان له دغه ویروسه خوندي شي.
