۸صبح، کابل: له پولیو پاک افغانستان بنسټ اعلان کړی چې د پولیو (د ماشومانو د ګوزڼ) واکسین کمپاین په ټول افغانستان کې پیل شوی دی.
دغه بنسټ دوشنبه د لړم پر ۱۱مه، له کورنیو غوښتي چې خپلو ماشومانو ته د واکسین په ورکولو سره هغوی له پولیو ناروغۍ خوندي کړي.
دغه کمپاین به د افغانستان په سوېلي زون کې د سېشنبې په ورځ د لړم پر ۱۲مه، پیل شي.
له پولیو پاک افغانستان بنسټ تل د دې ناروغۍ د له منځه وړلو لپاره د ماشومانو پر واکسینولو ټینګار کړی دی.
افغانستان او پاکستان د نړۍ یوازیني هېوادونه دي چې لا هم پکې د پولیو د وحشي ویروس د اخته کېدو پېښې ثبتېږي.
د واکسیناسیون د کمپاینونو له دوام سره سره، دغه ناروغي په دواړو هېوادونو کې لا هم د ماشومانو روغتیا ګواښي.
