۸صبح، لغمان: د لغمان ولایت په یوه ترافیکي پېښه کې دوو کسانو ژوند بایللی او درې نور ټپیان شوي دي.
په لغمان کې د طالبانو امنیه قوماندانۍ په یوه خبرپاڼه کې ویلي چې دغه پېښه د یکشنبې پر ماښام د لړم پر ۱۰مه، د دغه ولایت په قرغیو ولسوالۍ کې شوې ده.
طالبانو د دې پېښې لامل د موټرچلوونکو بېاحتیاطي بللې ده.
د طالبانو د ترافیکو مدیریت مسوولانو له موټرچلوونکو غوښتي چې د موټر چلولو پر مهال ترافیکي اصول مراعت کړي او له بېاحتیاطۍ او له ټاکلي سرعته له تېز تګه ډډه وکړي.
