۸صبح، هرات: په هرات کې ځينې بېوزله کورنۍ وايي چې د بشردوستانه مرستو نشتوالي، بېکارۍ، محدودیتونو او د ژمي په نږدې کېدو یې وضعیت سخت شوی دی.
سرچینو شنبه د تلې پر ۱۱مه ۸صبح ورځپاڼې ته وویل چې د بېوزلۍ او اقتصادي ستونزو په ډېرېدو نور د ژوند د لومړنیو اړتیاوو د برابرولو وس نه لري.
د سرچینو په خبره، په تېرو پنځو کالو کې د خلکو وضعیت سخت شوی او تر څنګ یې نارینهوو ته هم کاري بوختیاوې کمې شوې دي.
هغوی وايي چې په دې موده کې یې یو څه ښه ژوند له منځه تللی او اوس د شپې او ورځې ډوډۍ موندل ورته لویه ننګونه ګرځېدلې ده.
دا سرچینې زیاتوي چې بېوزلۍ او اقتصادي ستونزو، ناامنۍ او غلاوو ته لاره برابره کړې ده.
هغوی د ژمي په نږدې کېدو وايي چې د کورنیو د اړتیاوو د برابرولو په اړه اندېښنه لري او که دا وضعیت همداسې دوام وکړي، د بېوزلو کورنیو وضعیت به نور هم ترینګلی شي.
