۸صبح، هلمند: په هلمند کې سینمايي لوبغاړی عصمتالله افغان وايي چې د مالي ستونزو له کبله چمتو دی چې خپل ناروغ زوی هغه چاته وسپاري چې د درملنې لګښت یې پرې کړي.
افغان دوشنبه د وږي پر ۹مه په خپرې کړې ويډيو کې ویلي چې زوی یې ناروغ دی او شاوخوا یوه میاشت کېږي چې د هلمند په بست روغتون کې بستر دی.
نوموړي ویلي چې د خپل زوی د درملنې لګښت نه شي پوره کولی او په تېرو ۳۰ کالو کې هېڅکله هم له داسې وضعیت سره نه دی مخ شوی.
دغه سینمايي لوبغاړي زیاته کړې چې که هر څوک یې د زوی د درملنې لګښت ورکړي، چمتو دی هغه وروبښي په ځانګړې توګه هغه چې اولاد ونه لري.
افغان ویلي چې دا پرېکړه یې د ناچارۍ له کبله کړې او مجبوره دی چې دا غوښتنه وکړي.
دا په داسې حال کې ده چې په افغانستان کې د اقتصادي ستونزو له کبله روغتیايي خدماتو ته د ډېرو خلکو لاسرسی سخت شوی دی.
