۸صبح، هرات: په هرات کې ځايي طالب چارواکي وايي چې د دې ډلې د بهرنیو چارو وزیر امیرخان متقي په دغه ولایت کې له خپل ترکمنستاني سیال سره لیدلي دي.
په هرات د طالبانو د والي رسنیز دفتر پنجشنبه د وږي پر ۱۵مه په یوې خپرې کړې خبرپاڼه کې لیکلي چې امیرخان متقي د ترکمنستان د بهرنیو چارو له وزیر رشید مرادوف سره د تاپي پروژې د پرانېستې په اړه خبرې اترې کړې دي.
دا لیدنه د افغانستان پولې په صفري نقطه کې شوې ده.
د خبرپاڼې په حواله، څنګه چې افغانستان او ترکمنستان د تاپي پروژې مسوولیت لري، د پرانیستې له تخنیکي کار یې هم لیدنه شوې ده.
ورته مهال، سرچینو ۸صبح ورځپاڼې ته ویلي چې ټاکلې ده ډېر ژر د تاپي پروژې عملي چارې پېل شي.
د یادونې ده چې د روان کال د زمري پر ۳۱مه هم امیرخان متقي په تورغونډۍ بندر کې د ترکمنستان له بهرنیو چارو وزیر سره د تاپي په ګډون پر څو نورو پروژو خبرې اترې کړې وې.
ترکمنستان د هغو هېوادونو له ډلې دی چې له طالبانو سره نږدې اړیکې پالي.
