ولسمشر غني: د افغانستان لپاره د نړیوالو اړیکو نوی باب پرانیستل کېږي

د هېواد ولسمشر محمد اشرف غني وایي چې له افغانستانه د بهرنیو ځواکونو په وتلو سره، هېواد له انزوا سره نه مخ کېږي؛ بلکې د نړیوالو اړیکو نوی باب پرانیستل کېږي.
ښاغلي غني د غويي په اوومه نېټه په ارګ کې د اوبو او برېښنا اونۍ په پروګرام کې وويل چې د بهرنیو ځواکونو په وتلو سره به د اقتصادي مرستو په برخه کې هېڅ بدلون رانه شي.
هغه زیاته کړه چې حکومت به په راتلونکو څو اونیو کې له کورنیو سرچینو د اقتصادي تزریق او د نړیوالو سرچینو د بیاځلې ټاکلو یوه روښانه تګلاره خلکو ته اعلان کړي.
ولسمشر ډاډ ورکړ چې د بهرنیو ځواکونو په وتلو سره، افغان هوايي او امنیتي ځواکونه تمویلېږي او د وسایلو په برابرولو کې به کومه ستونزه رامنځته نه شي. هغه زیاته کړه چې په بېلابېلو برخو کې به د نړیوالې ټولنې مرستې دوام وکړي. هغه همداراز ټینګار وکړ چې افغانستان به خپل اهمیت له لاسه ورنه کړي.
له بلې خوا ښاغلي غني جوته کړه چې د بهرنیو ځواکونو په وتلو سره یوازینی بدلون چې رامنځته شوی دادی چې، هېواد ته فرصت ورکړل شي، آزادي، ولسواکي، سولې ته ژمنه، ملي یووالی، اسلامي هویت او خپله نړیواله بې طرفي په واقعي توګه ولري.
هغه زیاته کړه چې په اوسنیو شرایطو کې نړیواله بې طرفي یوه اړتیا ده. ولسمشر غني هیله څرګنده کړه چې په ټوله منځنۍ آسیا، ایران په تېره بیا پاکستان کې باید دا تدبیر له نورو سره د اړیکو د ټینګولو لپاره عملي شي.
هغه له نړیوالې ټولنې مننه وکړه او اوسنی وضعیت یې یو نوی باب وباله او وې وېل چې په دې پړاو کې به هماغه شان چې افغانان په سختو او ښو شرایطو کې یې یو بل ته د وحدت او یووالي لاسونه سره ورکړي بیا هم سره یو موټی شي.
ولسمشر غني وویل چې د جمهوریت غېږه پراخه ده؛ ځکه جمهوریت نه د هغه دی او نه د بل چا، ځکه په ټولو افغانانو پورې اړه لري.
د ویلو ده چې د بایډن ادارې د اعلان له مخې، بهرني ځواکونه به د روان زيږدیز کال د سپتمبر تر یوولسمې نېټې له افغانستانه ووځي او دا بهیر له همدا اوسه پيل شوی دی.
له بلې خوا، د هېواد ولسمشر محمد اشرف غني او د ملي روغې جوړې د عالي شورا رییس عبدالله عبدالله د بېلابېلو خبر پاڼو په خپرولو سره د غويي اتمې د مجاهدینو د بریا له امله مبارکي ویلې ده.
د ولسمشر په پيغام کې راغلي: اوس ددې وخت رارسېدلی چې طالبان له تاریخ څخه په عبرت اخیستو د هېواد د راتلونکي په اړه فکر وکړي او د ملي او ډېموکراتیکو بهیرونو له لارې د خلکو ارادې ته په مراجعه وکړي.
عبد الله عبدالله هم په خپل پیغام کې ټینګار کړی چې د هېواد د مجاهد ولس قربانیو ثابته کړه چې د ملت برخلیک یوازې د دوی په لاسونو بدلون موندلی شي.
محمد اشرف غني، د غويي اتمه د خلکو د آزادۍ او مبارزې ورځ بللې چې د ټولو قومونو او توکمونو د قربانۍ، عزم او ملي يووالي نښه ده.
ولسمشر ویلي مجاهدینو له بري وروسته طلایي فرصت له لاسه ورکړ او په هېواد کې د سیاسي، اقتصادي او ټولنیز ناورین د رامنځته کېدو لامل شوه.
محمد اشرف غني د هېواد اوسنی حالت حساس بللی او ټینګار یې کړی چې تېرو ترخو تجربو ته په پام سره باید د سولې روان بهیر په ښه توګه مدیریت شي.
۱۳۷۱هجري لمریز کال د غويي اتمه نېټه د پخواني شوروي د ملاتړي رژیم پر وړاندې د مجاهدینو د بریا ورځ ده.