ولسمـشر غـنـي او مـارشـال دوستم په ارګ کې سره وکتل

د هېواد ولسمشر محمد اشرف غني د کب په اتلسمه نېټه د ولسمشر له مخکیني لومړي مرستیال مارشال دوستم سره په ارګ کې وکتل. د رپوټونو له مخې، دواړو لوریو د هېواد د روانو حالاتو، د سولې بهیر د بریالي کېدو لپاره د ملي اجماع او د هېواد د امنیتي وضعیت په اړه خبرې وکړې.
که څه هم ارګ ددغې کتنې په اړه تراوسه څه نه دي ویلي، خو راحلې دوستم پر خپله فیسبوک پاڼه د یوې ویدیو په خپرولو سره وېلي چې په دغه یو نیم ساعته کتنه کې د هېواد د روان وضعیت او سولې د بهیر په اړه خبرې اترې وشوې.
په دې کتنه کې پر ولسمشر او مارشال دوستم سربېره، د ملي امنیت سلاکار حمدالله محب، د افغان دولت د مرکچي پلاوي غړي باتور دوستم او د مشرانو جرګې منشي راحلې دوستم هم ګډون درلود.
دوستم ته د مارشالۍ رتبې له ورکولو وروسته دا له هغه سره د ولسمشر لومړۍ لیدنه وه. د ملي جنبش ګوند مشر مارشال دوستم د کب په نهمه نېټه له دوو کلونو وروسته له جوزجان څخه کابل ته راستون شو. مارشال عبدالرشید دوستم د ملي یووالي حکومت پرمهال چې د ولسمشر لومړی مرستیال و له ولسمشر غني سره یې اړیکې ترینګلې وې.
عبدالرشید دوستم چې کله د ولسمشر لومړی مرستیال و، د څه مودې لپاره په نه اعلان شوې توګه په ترکیه کې جلا وطن و او په خپله یې هم ویلي و چې ځینو کسانو یې هېواد ته راستنېدو مخنیوی کاوه.
هغه له پراخو لاریونونو وروسته چې د هېواد په شمال کې د درېیو اونیو لپاره د نظام الدین قیصاري د خوشي کولو په موخه ترسره شوي و، د ۱۳۹۷ کال په جنګاښ میاشت کې هېواد ته راستون شو. د ولسمشرۍ په وروستیو ټاکنو کې، عبدالرشید دوستم له عبدالله عبدالله څخه ملاتړ وکړ او د انتخاباتو له جنجالي کېدو او سیاسي موافقې له لاسلیک وروسته، دوستم ته د مارشالۍ رتبه ورکړل شوه.