ولسمشر غني ایران ته په خطاب کې: وړیا اوبه نه درکوو، تېل راکـړئ اوبــه واخـلـئ

د هېواد ولسمشر محمد اشرف غني د وري په څلورمه نېته د کمال خان بند په پرانیستونکو مراسمو کې ایران ته په خطاب کې وویل چې افغانستان له دې وروسته د هلمند تړون عملي کوي او وړیا اوبه نه ورکوي.
ولسمشر په خپله وینا کې ووېل: «زه غواړم د ایران د اسلامي جمهوریت په اړه څو خبرې وکړم، مخکې چې هر څه وو، څه مو چې لرل او یا مو نه لرل، د تاریخ خبره ده، د ایران او افغانستان اقتصاد د یو بل پوره کوونکي دي او د یو بل مخالف نه دی.»
ښاغلي غني زیاته کړه چې اوبه چا ته وړیا نه ورکوو او د نیمروز اوبه په ویاړ سره پر ایران پلوري.
ولسمشر وویل چې له ایرانیانو سره د خبرو په حال کې دی چې نیمروز نه یوازې د افغانستان کندو وي، بلکې د ایران په کندو هم بدل شي.
محمد اشرف غني د هلمند اوبو د تړون په یادولو سره چې د محمد موسی شفیق د لومړي وزارت پرمهال لاسلیک شو ووېل چې دا تړون، له ایران سره د ټولو افغانانو تړون دی.
د ولسمشر غني په خبره، په دغه تړون کې ستونزه نه وه، خو ستونزه یې په عملي کولو کې وه.
ښاغلي غني زیاته کړه چې له دې وروسته افغانستان د هلمند کیلي په لاس کې لري او له ایران سره خپله ژمنه عملي کوي. د ولسمشر په وینا، له تړونه په زیاته اندازه اوبو استول خو د مذاکرې خبره ده.
ولسمشر جوته کړه چې که ایران تېل راکړل، اوبه غوښتی شي. محمد اشرف غني همداراز وویل چې له دوو نړیوالو شرکتونو او ایران سره به د باد د مدیریت او لمریزې برېښنا پر تولید کار وکړي. د هغه په وینا، لومړنۍ څېړنې ښيي چې په افغانستان کې ۷۰ زره میګاواټه بادي برېښنا تولیدېدای شي.
ښاغلی غني وايي، هغه بادونه چې د نیمروز اوسېدونکي ځوروي، د انرژۍ په لویه سرچینه به بدل شي. ولسمشر وايي چې افغانستان د بادي او لمریزې برېښنا د تولید او بندرونو د پراختیا په اړه له ایران سره خبرې کوي.
ولسمشر همداراز ووېل چې موسمي بدلونونه سیاسي پولې نه پېژني. هغه پر سیمه ییزو همکاریو ټینګار وکړ او زیاته یې کړه، که د آسیا په سویل کې ۵،۲ درجې تودوخه زیاته شي، د سل میلیونه وګړو د بې ځایه کېدو لامل کېږي.
محمد اشرف غني د نیمرزو ولایت چهاربرجک ولسوالۍ ته په سفر کې کمال خان بند پرانیست. ددغه بند پرانیستل د هېوادوالو له تاوده هرکلي سره مخامخ شوي دي. د کمال خان بند جوړولو په ایراني لوري کې یو لړ اندېښې راولاړې کړې دي.
د کمال خان بند په پرانیستونکو مراسمو کې پر ولسمشر سربېره د هغه لومړي مرستیال امرالله صالح، دوهم مرستیال سرور دانش او یو شمېر نورو حکومتي چارواکو ګډون کړی و.
کمال خان بند چې د زرنج ښار په ۹۵ کیلومترۍ کې پروت دی ۱۶ متره لوړوالی او د ۵۲ میلیونه متر مکعبه اوبو د زېرمه کولو وړتیا لري.
دغه بند د نهه میګاواټه برېښنا د تولید ظرفیت لري او همداراز ۱۸۰ زره هکتاره ځمکې خړوبولی شي.