ولسـمشـر غـنـي پـه قطــر کـې د مذاکراتو له بل پړاو سره سلا شو

ولسمشر محمد اشرف غني چې له دې مخکې یې طالبانو ته بلنه ورکړې وه د ننه په هېواد کې مذاکراتو ته دوام ورکړي، په قطر کې یې د دغو خبرو له دوهم پړاو سره موافقه کړې ده.
د ولسمشر ویاند صدیق صدیقي پر خپله ټویټر پاڼه ولیکل چې د ملي روغې جوړې د عالي شورا د رییس او د مرکچي پلاوي د مشر د غوښتنې او د مذاکراتو په دوهم پړاو کې د ځنډ د مخنیوي لپاره د نړیوالو ملاتړو ډلو د مشوري له مخې، ولسمشر موافقه وکړه چې ددغو خبرو دوهم پړاو په قطر کې ترسره شي.
صدیقي ټینګار کړی چې د ننه په هېواد کې د مذاکراتو د نورو پړاوونو د ترسره کولو لپاره زموږ غوښتنه پر خپل ځای ده. د ملي روغې جوړې د عالي شورا د مشرتابه کمیټې هم د عبدالله عبدالله په مشرۍ ناسته کې له طالبانو ډلې سره د سولې مذاکراتو د دوهم پړاو لپاره د قطر کوربتوب تایید کړ.
له دې مخکې حکومت وړاندیز کړی و چې د خبرو بل پړاو د ننه په هېواد کې ترسره شي.
د سپېدار د اعلان له مخې، د ملي روغې جوړې د عالي شورا د مشرتابه کميټې په ناسته کې په ټاکلي وخت د مذاکراتو د پیلېدو پر څرنګوالي، په خبرو کې د اجنډا پر لومړیتوبونو، د مرکچي پلاوي د پیاوړي کولو، د یووالي او اجماع، د اوربند د اړتیا او ارزښت، د بې ګناه افغانانو د وژنو او وینې تویولو د درولو او د وګړو د اساسي حقونو او بیان د آزادۍ په اړه بحث او خبرې وشوې.
په دغه ناسته کې پرېکړه شوې چې د دولت مرکچي پلاوی د دولت د ملاتړ او باور وړ دی او یوازې همدا پلاوی د اسلامي جمهوریت او هېوادوالو استازیتوب کوي.
همداراز د ملي روغې جوړې د عالي شورا د مشرتابه کمیټې په ناسته کې پرېکړه شوې چې یوه تخنیکي کمیټه جوړه شي او د مذاکراتو دوهم پړاو ته د پلاوي له تلو مخکې د افغانستان د اسلامي جمهوریت لومړیتوبونه ترتیب کړي.
له دغو لومړیتوبونو به د ملي روغې جوړې عالي شورا د مشرتابه کمیټې له تایید وروسته، د دولت د مرکچي پلاوي لپاره د ملاتړي لارښود په توګه کار واخیستل شي.
د ملي روغې جوړې د عالي شورا رییس عبدالله عبدالله په دغه ناسته کې ویلي چې د مذاکراتو بل پړاو په قطر کې ترسره کېږي.
د هغه په وینا قطر د لومړي پړاو مذاکراتو کوربتوب وکړ او د سولې ملاتړو او آسانچارو هېوادونو چې د مذاکراتو د بل پړاو د کوربتوب لپاره یې چمتووالی ښودلی و، د کووېد نولس ناروغۍ د ستونزو او محدودیتونو له امله د قطر له خوا ددغو خبرو له کوربتوبه یې ملاتړ کړی دی.
د مذاکراتو له درېدو وروسته، د ولسمشر د ملي امنیت سلاکار حمدالله محب وړاندیز وکړ چې د مذاکراتو بل پړاو د ننه په هېواد کې ترسره شي.
ولسمشر غني هم له دې وړاندیزه ملاتړ وکړ، خو طالبانو ورسره مخالفت وښوود.
د سولې د مذاکراتو لومړی پړاو د وږي په ۲۲مه په قطر کې پيل شو او د لیندۍ تر ۲۲مې یې دوام وکړ.
ټاکل شوې چې د خبرو دوهم پړاو د مرغومي په شپاړسمه نېټه بیا پیل شي. د سولې په خبرو کې دا ځنډ د مذاکراتو د اجنډا په اړه د مشورې لپاره د دواړو لوریو په موافقه رامنځته شو.