د آسیا زړه – استانبول بهیر غونډه کې د ټاکنو له لارې د واک پر لېږد د ولسمشر غني ټینګار

د اسیا د زړه – استانبول بهیر د غړو هېوادونو نهم پړاو غونډه چې د تاجکستان پلازمېنه دوشنبه کې جوړه شوې وه د وري په لسمه نېټه د یوې اعلامیې په خپرولو سره پای ته ورسېده. په اعلامیه کې د سولې پر ټینګښت، په سوله ییز ډول د افغانستان کړکېچ پر پای ته رسېدو او د تېرو شلو کلونو د لاسته راوړنو پر خوندیتوب ټینګار شوی دی. په اعلامیه کې زیاته شوې چې په افغانستان کې سوله د سیمې او نړۍ د ثبات لپاره ګټوره ده.
په دغه دوه ورځنۍ غونډه کې د آسیا زړه – استانبول بهیر غړو هېوادونو د بهرنیو چارو وزیرانو، د افغانستان او تاجکستان ولسمشرانو، د ملګروملتونو او د دغه بهیر ملاتړو هېوادونو استازو ګډون کړی و.
افغان ولسمشر محمد اشرف غني د آسیا د زړه ـ استانبول بهیر نهم پړاو غونډې ته په وینا کې وویل چې سوله یې لومړیتوب او یوه مهمه اړتیا ده. ولسمشر د کړکېچ پای ته رسېدو احتمالي طرحې په هکله وویل، حکومت یې د سولې حکومت مسوولیت لري او له وخته د مخکې ټاکنو ملاتړ کوي.
ښاغلي غني، د دغې غونډې په څنډه کې د پاکستان، ترکیې او هند له بهرنیو چارو وزیرانو سره د افغان سولې، سوداګریزو اړیکو او سیمه ییزي همکارۍ په اړه کتنه او خبرې اترې وکړې.
ولسمشر وايي: هغه ټاکنې چې د سولې خبرو په پایله کې ترسره کېږي باید د اساسي قانون پر بنسټ، سراسري، عادلانه او روڼې وي او نړیواله ټولنه یې هم څارنه وکړي.
ولسمشر غني پر عمومي اوربند هم ټینګار وکړ او ویې ویل چې نړیوال بنسټونه دې دا اوربند څارنه وکړي.
د تاجکستان ولسمشر امام علي رحمان ژمنه وکړه، چې حکومت به یې په افغانستان کې د سولې راوستو له بهیر سره تر خپله وسه مرسته وکړي.
په دغه ناسته کې پر افغان سولې سربېره د سیمې هېوادونو د سیاسي، اقتصادي او امنیتي همکاریو پر پراختیا هم خبرې وشوې.