په کندهار کې ځايي سرچینې وايي چې پاکستاني پوځيانو په چمن کې یو ځوان وژلی او څلور نور یې ټپيان کړي دي.
دا پېښه چهارشنبه د وري پر ۸مه شوې ده.
د سرچینو په خبره، پاکستاني پوځيانو خلکو ته ګوتڅنډنه کړې که لاریون وکړي له ورته برخلیک سره به مخ شي.
وژل شوی ځوان رباط نومېده چې لومړی د پاکستاني پوځيانو له خوا په ډزو وژل شوی او وروسته یې مړی له ځان سره وړی دی.
د سرچینو په حواله، پاکستاني پوځيانو خلکو ته ویلي چې د رباط مړی هغه مهال خپلې کورنۍ ته سپاري چې ژمنه وکړي په راتلونکې کې لاریون نه کوي.
د یادونې ده چې له میاشتو راهیسې په چمن کې مېشتو خلکو د پاکستاني حکومت د هغې پرېکړې پر وړاندې پرلت روان کړی چې پر ډيورنډ کرښه د اوښتو را اوښتو لپاره پاسپورټ حتمي کوي.
دمګړۍ څوک له ویزې او پاسپورټ پرته د سپین بولدک او چمن له دروازې د کرښې دواړو غاړو ته د اوښتو را اوښتو اجازه نه لري.
