په هلمند کې د سلګونه مېرمنو لپاره د کاري زمینې برابرول

یوې هلمندۍ مېرمنې د یوې کارخونې په جوړولو سره سلګونه ښځو ته د کار زمینه برابره کړې ده.
په هلمند د لاسي صنایعو په دغه کارخونه کې هغه مېرمنې کار کوي چې د خپلې کورنۍ سرپرستي پر غاړه لري او په خپل زیار سره د کورنۍ اړتیاوې برابروي.
دغه کارخونه چې د یوې هلمندۍ مېرمنې له خوا جوړه شوې ده، په دې ولايت کې یې ۳۰۰ بې سرپرسته ښځو ته د کار او لاسي صنایعو د زده کړې زمینه برابره کړې او له دې لارې خپلو کورنیو ته حلاله روزي پیدا کوي .
دغه مېرمنې په کارخونه کې جامې او ځانګړې هلمندۍ څپلۍ جوړوي، چي د ننه په هېواد پلورل کېږي، خو دوی خپلو توليداتو ته د بازار موندنې غوښتنه کوي.
د کارخونې مسووله نسیمه اسحاقزۍ وایي چې د چا له مرستې پرته یې یو کال مخکې دغه کارخونه په پنځو مېرمنو سره پیل کړه چې د کارګرو مېرمنو شمېر ورځ تربلې زیاتېږي او دا مهال سلګونه کارکوونکې لري .
آغلې اسحاقزۍ زیاتوي، تولید شوي توکي نه یوازې په هلمند بلکې د هېواد په یو شمېر نورو ولایتونو کې هم بازار لري خو د دوی اړتیاوې نه شي پوره کولای.
د څپليو او لاسي صنایعو په دغه کارخونه کې اوسمهال په دریو جلا جلا برخو کې ۳۰۰ مېرمنې کار کوي.
د کارخونې کارکوونکې هم وايي چې له دې مخکې له ګڼو ستونزو سره مخامخ وې خو اوس په خپله د کورنۍ اړتياوې پوره کولای شي. اخوا د هلمند د ښځو چارو رئیسه وايي چې د نسیمې اسحاقزۍ کارخونې د ډېری هغو مېرمنو په ژوند کې مثبت بدلون راوستی چې خاوندان یې په جګړو کې له لاسه ورکړي دي.
هغه وايي چې له دغې کارخونې سره د ښځو چارو ریاست او کومې موسسې له خوا همکاري نه کېږي بلکې مېرمن اسحاقزۍ په خپلو امکاناتو دا کارخونه جوړه کړې ده.
د ښځو چارو رئیسه زیاتوي چې ددې ترڅنګ د سینګار او خیاطۍ دوه نور کار ځایونه هم شته چې مشري یې د ښځو له خوا کېږي.
نوموړې وايي، په وروستیو جګړو کې دوي سل داسې کورنۍ ثبت کړې چې هېڅ نارینه نه لري او د کورنۍ د لګښتونو برابرول او سرپرستي د مېرمنو پر غاړه ده.
که څه هم په دې ولایت کې کلتوري محدودیتونه شته، خو سره له دې په دغه کارخونه کې د ښځو لپاره د کار زمینه برابره شوې ده .