۸صبح، کابل: د روسیې ولسمشر ولادیمیر پوتین وايي، د ټولیز امنیت تړون سازمان (CSTO) غړي هېوادونه د افغانستان امنیتي وضعیت له نږدې څاري.
پوتین دغه څرګندونې چهارشنبه، د لړم پر ۲۰مه، په مسکو کې د دغه سازمان د امنیت شورا په غونډه کې کړې دي.
هغه زیاته کړې چې دغه اقدام د سازمان د غړو هېوادونو د پولو د امنیت د پیاوړتیا لپاره د هڅو په لړ کې ترسره کېږي.
د پوتین په وینا، د افغانستان بدلونونه هم له هغو موضوعاتو دي چې د دغه سازمان غړي هېوادونه یې په جدي توګه څاري.
د ټولیز امنیت تړون سازمان له روسیې، تاجکستان، قزاقستان، قرغزستان، بلاروس او ارمنستانه جوړ دی.
دغه سازمان تر دې مخکې هم د افغانستان له خاورې نورو هېوادونو ته د رامنځته کېدونکو امنیتي ګواښونو په اړه اندېښنه څرګنده کړې او د تاجکستان او افغانستان ترمنځ د پولې پیاوړتیا یې له خپلو امنیتي لومړیتوبونو بللې ده.
