د ایران د پارلمان رییس محمدباقر قالیباف خبرداری ورکړی چې که د ایران امنیت تضمین نه شي، په سیمه کې به هېڅ زیربنا خوندي نه وي او تهران به هر ډول ګواښ ته چټک او سخت غبرګون وښيي.
الجزیرې سهشنبه د سپټمبر پر ۲۹مه راپور ورکړی چې قالیباف دا څرګندونې د هرمز تنګي په اړه د امریکا د ولسمشر ډونالډ ټرمپ خبرو ته په غبرګون کې کړې دي.
قالیباف ویلي: «هغه سیمه کې چې ایران ونه توانېږي، نفت پکې وپلوري، بل هېڅوک به هم نفت ونه شي پلورلی.»
نوموړي زیاته کړې چې د سمندري کلابندۍ لپاره د امریکا هڅې، د هوايي لیکو تړل او د ایران پر سوداګریزو لارو فشار به ماتې وخوري.
هغه امریکا او نورو هېوادونو ته ګوتڅنډنه کړې چې تهران به هر ډول ګواښ ته چټک او سخت ځواب ورکړي.
