د ایران د پارلمان رییس محمدباقر قالیباف ویلي چې امریکا سیمې ته د نظامي تجهیزاتو له لېږد سره هممهاله ادعا کوي چې د جګړې درولو په لټه ده.
قالیباف دوشنبه د جولای پر ۲۰مه په اېکس کې د امریکا پر پالیسو د نیوکې ترڅنګ زیاته کړې چې تهران د هغه څه په اړه چې د «امریکا لوبې» یې بللې، د تجربې پړاو ته رسېدلی او پر همدغه بنسټ چمتو شوی دی.
نوموړي ویلي: «هغوی زموږ پر هوښ د خپلې لنډې ایکیو ګومان کړی دی. موږ د دغو امریکايي لوبو په پېژندلو کې د استادۍ تر کچې رسېدلي یو او پر همدغه بنسټ چمتو شوي یو.»
قالیباف ټينګار کړی چې د هېوادونو اقدامات دې د هغوی د ادعاوو ښکارندوي وکړي، نه دا چې په ټکر کې یې وي.
دا په داسې حال کې ده چې په سیمه کې د امریکا او ایران ترمنځ ترینګلتیاوې دوام لري.
