د قطر استازی: طالبانو ته مو ویلي چې د جګړې له لارې واک ته نه شـئ رسېدای

د شخړو په اواري کې د قطر د بهرنیو چارو وزارت مسوول او د افغانستان لپاره د نوموړي هېواد ځانګړي استازي مطلق بن ماجد القحطاني د چنګاښ په ۱۵مه نېټه د ولسمشر له دوهم مرستیال سروردانش سره په کتنه کې ویلي چې د قطر دولت او هغه په خپله د طالبانو استازو ته ویلي چې د جګړې او تاوتریخوالي له لارې د افغانانو پر برخلیک نه شي واکمنېدای او د افغانستان قضیه پوځي حل لاره نه لري.
سرور دانش په دغه کتنه کې د قطر د دولت له خوا په تېرو دوو کلونو کې د افغانستان د سولې مذاکراتو د کوربتوب له امله مننه وکړه. هغه وویل چې د هېواد په بېلابېلو سیمو کې د طالبانو د بریدونو له امله د تاوتریخوالي زیاتوالي د سولې بهیر بې اعتباره کړی دی. د ولسمشر دوهم مرستیال زیاته کړه: «افغانان له جګړې او تاوتریخوالي ستومانه شوي او د سولې د ټینګښت په تمه دي؛ خو که طالبان غواړي د زور لارې پرخلکو واکمن شي افغانان به هېڅکله دوی ته تسلیم نه شي.»
سرور دانش همداراز ویلي چې که طالبان د سولې مذاکراتو ته پاملرنه ونه کړي او تاوتریخوالي ته دوام ورکړي، جګړه او تاوتریخوالی به بل ډول دوام وکړي. د هغه په وینا، د تاوتریخوالي کمښت د باور جوړونې او د افغانستان د قضیې د سیاسي حل منل د سولې د خبرو لومړني اصول دي او د هېواد ټول مېشت قومونه په هېواد کې د عادلانه او تلپاتې سولې غوښتونکي دي.
دانش زیاته کړې چې د سولې مذاکراتو د پرمختګ او په دې بهیر کې د بندون ماتولو لپاره، افغان دولت د قطر دولت یا د ملګروملتونو سازمان په منځګړيتوب د رغنده مذاکراتو دوام غواړي او پرې ټینګار کوي. د سرور دانش دفتر ویلي چې په دې کتنه کې مطلق بن ماجد القحطاني هم د مذاکراتو له لارې د افغانستان د قضیې پر حل ټینګار کړی دی.
له بلې خوا، مطلق بن ماجد القحطاني په دغه سفر کې د حزب اسلامي له مشر ګلبدین حکمتیار، د هېواد د بهرنیو چارو له وزیر محمد حنیف اتمر او د هېواد له مخکیني ولسمشر حامد کرزي سره کتلي او د هېواد د روانو حالاتو او د سولې د بهیر په اړه یې ورسره خبرې اترې کړې دي.
په کابل کې د قطر سفارت سرپرست عبدالناصرالحجري هم ویلي چې هېواد یې د افغان سولې مذاکراتو لپاره هېڅ پټه اجنډا نه لري، بلکې هڅه کوي چې په دغو حساسو شرایطو کې له دواړو لوریو سره د رغنده خبرو د دوام په موخه مرسته وکړي.