۸صبح، کابل: د افغانستان لپاره د ملګرو ملتونو د سرمنشي ځانګړې استازې او د یوناما مشرې رباب فاطمې ویلي چې د خبریالانو کار د خبرو اترو، سولې او ښې حکومتولۍ د پیاوړتیا لپاره اړین دی.
هغې دوشنبه د لړم پر ۱۱مه، د خبریالانو پر وړاندې د جرمونو د معافیت د پای ته رسولو د نړیوالې ورځې په مناسبت د خبریالانو د خوندیتوب غوښتنه کړې ده.
رباب فاطمې زیاته کړې چې د هغو خبریالانو خوندیتوب باید په افغانستان او ټوله نړۍ کې لومړیتوب ولري چې خپل ژوند یې د حقیقت موندلو ته ځانګړی کړی دی.
دا په داسې حال کې ده چې پر افغانستان د طالبانو له واکمنېدو وروسته، خبریالان له سانسور، ګواښونو، نیونو او مخ پر زیاتېدونکو محدودیتونو سره مخ شوي دي.
