د هندوستان د کرکټ ملي لوبډلې پخواني لوبغاړي او لوبډلمشرکرېس سريکانټ په خپلو تازه څرګندونو کې ويلي چې راشد خان د هندوستان پريمير ليګ IPL ترټولو با ارزښته لوبغاړی دی.
کرېس سريکانټ د ۱۹۸۱ – ۱۹۹۲ زېږديز کلونو ترمنځ د هندوستان د کرکټ لوبډلې لوبډلمشر پاتې شوی دی.
نوموړي په خپل ټوېټر ليکلي، راشد خان تر دې دمه پورې د سنرایزر حيدر اباد لوبډلې سره ډېره مرسته کړې ده او نوموړی يې د هندوستان پريمير ليګ یا IPL ارزښت لرونکی لوبغاړی ياد کړی دی.
راشد خان ارمان چې په راشد خان مشهور دی د افغانستان د کرکټ ځوان او با استعداده لوبغاړی دی. نوموړی د ١٩٩٨ زېږديز کال د سپټمبر په ٢٠مه په ننګرهار کې زيږيدلی دی. نوموړي تر دې مهاله د افغانستان لپاره د هند په سوداګريز ليګ (IPL)، بنګله دېش سوداګريز ليګ (BPL)، د اسټراليا کرکټ ليګ (BBl) او د نړۍ مختلفو ليګونو کې لوبېدلی او ځلېدلی دی راشدخان په ښي لاس (Leg break googly) توپ اچونه کوي او په لوبډله کې د توپ اچوونکي په توګه ځای لره، که څه هم نوموړی په توپوهنه کې هم له چا وروسته نه دی.
د راشد خان ترڅنګ، محمد نبي او مجيب الرحمن هم هغه افغان ستوري دي چې له نږدې څو کلونو راهيسې د نړۍ نورو نوموتو کرکټ ليګونو ترڅنګ د هندوستان کرکټ غوره ليګ کې هم لوبېږي. دوی درې واړه سږکال يوځای د سنرایزر حيدر اباد کرکټ لوبډلې سره دي او د افغانستان استازولي کوي.
