۸صبح، کابل: د رواداري په نوم د بشري حقونو بنسټ ویلي چې پر افغانستان د پاکستان پوځي بریدونه په تېره بيا، په کابل کې د روږدو کسانو د درملنې پر يو مرکز هوايي برید له نړیوالو قوانینو ښکاره سرغړونه ده او کېدای شي د جنګي جنايتونو بېلګه وبلل شي.
دغه بنسټ دوشنبه د زمري پر ۵ مه، په یوه راپور کې ویلي چې د ۲۰۲۴ کال د ډسمبر له لومړۍ د ۲۰۲۶ کال د جون تر پایه د پاکستاني ځواکونو په بریدونو کې لږ تر لږه ۱۱۸۱ ملکي وګړي وژل شوي یا ټپیان شوي دي.
د راپور له مخې، د پاکستاني ځواکونو په بریدونو کې تر ۲۹ زره ډېرې کورنۍ هم بېځایه شوې او په خوست، پکتیا، پکتیکا، نورستان، ننګرهار، کندهار، هلمند او کابل ولایتونو کې د استوګنې سلګونه کورونه، روغتیايي مرکزونه، ښوونځي، جوماتونه او نور ملکي تاسیسات ویجاړ شوي دي.
په راپور کې راغلي چې په کابل کې د روږدو کسانو د درملنې پر يو مرکز د پاکستان په هوايي برید کې لږ تر لږه ۳۰۰ ناروغان او کارکوونکي وژل شوي یا ټپیان شوي دي. د رواداري په وینا، دغه برید د نړیوالو بشري حقونو له بنسټیزو اصولو ښکاره سرغړونه ده.
رواداري همداراز ویلي چې پاکستاني ځواکونو د دوو میاشتو لپاره د نورستان د کامدېش او برګمټال ولسوالیو ترمنځ د تګ راتګ لاره تړلې وه. د دې ادارې په وینا، دې کار خوړو، روغتیايي خدمتونو او نورو اساسي اړتیاوو ته د سیمې د اوسېدونکو لاسرسی له جدي ستونزو سره مخ کړی و.
دې ادارې زیاته کړې چې د پاکستاني ځواکونو د بریدونو پایلې یوازې تر مرګژوبلې او مالي زیانونو محدودې نه دي پاتې شوې، بلکې د وېرې او ناامنۍ زیاتوالی، د ما
شومانو د زده کړو ګډوډېدل، د بېوزلۍ ډېرېدل، بېځایه کېدل او پراخ رواني او ټولنیز زیانونه یې هم رامنځته کړي دي.
