۸صبح، کابل: د بشري حقونو «رواداري» بنسټ د طالبانو د دوو وزیرانو د نیولو له حکمونو هرکلی کړی او دا یې په افغانستان کې د بشریت ضد جرمونو د تورونو په تړاو د حساب ورکونې لپاره مهم ګام بللی دی.
رواداري سه شنبه د تلې پر ۱۴مه، په یوه اعلامیه کې ویلي چې دغه دوه حکمونه د ښځو او نجونو پر وړاندې د «جنسیتي ځورونې» او د هغو کسانو د ځورونې او تعقیب په تور صادر شوي چې د ښځو د حقونو په برخه کې د طالبانو له تبعیضي سیاستونو سره یې مخالفت کړی دی.
رواداري له دولتونو غوښتي چې د جرمونو نړیوالې محکمې پرېکړه جدي وګڼي او «له مجازاتو د معافیت» پر وړاندې د مبارزې او عدالت ته د قربانیانو د لاسرسي د برابرولو لپاره له نړیوالو قضايي بهیرونو ملاتړ وکړي.
دغه بنسټ ویلي چې افغان ښځې او نجونې په تېرو پنځو کلونو کې له خپلو اساسي حقونو چې زده کړې، تحصیل، کار، د تګ راتګ ازادي او په ټولنیز او عامه ژوند کې ګډون هم پکې شامل دي، محرومې شوې دي.
رواداري همداراز له هغو ښځو او نجونو، د قربانیانو له کورنیو، د بشري حقونو له مدافعانو، مدني فعالانو او خبریالانو مننه کړې چې د بشري حقونو د سرغړونو مستند کولو او د قربانیانو لپاره د عدالت غوښتنې ته یې دوام ورکړی دی.
دغه بنسټ ټینګار کړی چې د بشري حقونو د جدي سرغړونو او نړیوالو جرمونو اړوند تورونه باید په خپلواکه او بې پرې توګه او د حقوقي معیارونو له مخې وڅېړل شي.
د جرمونو نړیوالې محکمې دوشنبه د تلې پر ۱۳مه، د طالبانو د پوهنې وزیر حبیب الله اغا او د طالبانو د لوړو زده کړو وزیر ندا محمد ندیم د نیولو حکمونه اعلان کړل.
د حبیب الله اغا او ندا محمد ندیم د نیولو حکمونه د طالبانو د مشر هبتالله اخوندزاده او د طالبانو د سترې محکمې د رییس عبدالحکیم حقاني د نیولو د حکمونو په دوام صادر شوي دي.
